Optredes

Bespreek Marinda vir optredes

Dis ‘n groot lekkerte om te kan optree by funksies, gesellighede, vroue-oggende en konferensies.  Die jaar het ek heelwat feeste en optredes gedoen. Gewoonlik by die feeste kom feesgangers en dan doen ek een of ander demo vir hulle. Die feesgangers kry dan ook die geleentheid om te dit te proe wat ek maak. Daar is gewoonlik ‘n lekker ontspanne atmosfeer.

Ek is ook gereeld ‘n spreker by vroue-oggende of ma-en dogter-oggende. Ek gesels en motiveer. Ons lag en ons huil. Ons praat oor gewig en oor al ons hang downs dat ‘n push-up bra ons nie eers meer kan oplig nie. Ek verseker hulle dat solank hulle nie swaarder as hul yskaste weeg nie, is hulle nog oriaat.

Aardklop demonstrasie

Ek het ook die voorreg om by berade te kan optree waar ek met professionele persone gesels en hul grense probeer verskuif.  Vir my is daar tussen ‘n groef en ‘n graf min verskil. Albei is n plek van rus en gemak. Jy moet elke dag ietsdoen wat jou bietjie bang maak.

Die WAT het my vanjaar gevra om by hul kwartaalfunksie op te tree. Ek het gekook en gesels. Oor kos en die letterkunde. Een is voedsel vir die liggaam en die ander is voedsel vir die siel.

Deesdae bespreek vriendinne my vir kleiner intiemer funksies. Ek daag by hul huise op en kook vir die gaste ‘n maaltyd van hul keuse in hul eie kombuis. Hulle sit om my en leer terwyl ek kook. Ons drink wyn, kuier en eet saam.

Vir die res van die jaar lê daar nog Skole Kook se finaal voor. Dis n kookprogram vir kykNET waar hoërskoolleerders teen mekaar uitkook om die beste skolekookspan te kry. Omdat ek uit ‘n onderwysagtergrond kom, is dit vir my heerlik om met die leerders te werk. Dan tree ek nog by ‘n paar vroue-oggende op en kook in ‘n paar huise. En dan kom die groot rus in my huis in Yzerfontein.

Indien jy belangstel daarin om my te bespreek vir ‘n optrede, kontak marindakook@gmail.com.

Skolekook