Hier oor die groot dae soek ons mos vir bietjie sonde in die kospotte. Ons hang ons op aan al die overdaad. Nou as die kinders of die man vra vir n soetigheidjie – maak die blokkies. Ek maak dit sommer in die mikrogolf. Dis geil, ryk en lekker. Klein happies!
BENODIG:
- 125ml strooisuiker
- 125 ml gouestroop
- 125 ml grondboontjiebotter
- 15 ml kakao
- 750 ml sjokoladerys (Coco Pops)
- 180 g sjokolade
- 60 ml melk of room
NOU:
- Sit die strooisuiker, gouestroop, grondboontjiebotter en kakao in n bak wat in die mikrogolf kan gaan.
Mikrogolf op vol sterkte vir 90 sekondes – roer dit. Nog 60 sekondes en dan haal jy dit uit. Roer dit behoorlik deur. - Gooi die rysvlokkies by die mengsel en meng totdat al die rysvlokkies bedek is met die sous.
- Spuit n bak met spray en cook en druk die rysvlokkiemengsel vas in die bak.
- In n bakkie of beker breek die sjokolade en gooi die melk by. Smelt in die mikrogolf vir 1 minuut op vol krag en roer tot dit loperig is.
- Giet dit bo-oor die ryvlokkies en sit in die yskas.
- Na sowat n uur kan jy dit in blokkies sny en dit eet.
Dis n vinnige nagereg , iets saam met die koffie of iets as die slaap jou ontwyk in die nag.
Onthou klein happies.
Ek wil net weet hoe smelt jy die sjokolade in mikrogolf.Dis seker op n lae persentasie.Dankie
Annarie, ek gooi eers die melk in en dan die sjokolade. Ek smelt op vol krag vir 1 minuut. Dan haal ek dit uit en roer die sjokolade in die warm melk. Mooi dag. Marinda
Marinda dit moet gemaak word, so kan jy enige iemand stil kry met die heerlike sjokolade blokkies.
Kleina, ek maak vandag nog n klomp. My gesin het die eerste blokkies opgeeet – stil geeeet. Marinda
Om wonderlike resepte en die fantastiese aanbieding daarvan te kan komplementeer is voorwaar n voorreg
Baie dankie. Ek waardeer dit.
Baie dankie vir al jou resepte wat jy so onbaatsugtig deel! Versot op jou boneslaai. Mak gereeld om te bottel. Voorspoed, seën, goedheid & guns vir jou Marinda!
Dankie vir die mooi terugvoer. Ek resepte is daar om met ander te deel. Dan eet ons mos almal lekker.
Marinda ek volg jou gedurig. TV program was uitstekend. Maklik met Marinda….glo my…dis so maklik en lekkerrrr.
Dawn, hou aan kook!