Sjokoladekoek

Ek het die sjokoladekoekresep by my ma gekry.  Soveel keer gebak vir al wat ‘n funksie is. Dit is ‘n lekker klam koek en hou vir ten minste 3 dae.  Hoe jy hom versier is in jou hande.  Ek het myne  bo- op met Caramel Treat en mooi blommetjies versier.  Tussen die twee lae het ek bessiekonfyt en Caramel Treat gesit.

Bestanddele

  • 4 eiers
  • 340 ml suiker
  • 40 ml appelkooskonfyt
  • 2,5 ml sout
  • 200 ml kookwater + 50 ml brandewyn
  • 125 ml olie
  • 125 ml kakao
  • 500 ml koekmeel
  • 15 ml bakpoeier

Metode

  1. In jou mengbak klits die eiers,suiker, appelkooskonfyt en sout saam met ‘n elekstriese kitser totdat dit lig en romerig is.
  2. In ‘n beker meng die kookwater en brandewyn ,kakao en olie. Al die kakao moet opgelos wees.
  3. Sif nou die koekmeel en bakpoeier by jou eiermengsel.
  4. Voeg die kakaomengsel by en klits alles baie goed saam
  5. Smeer twee koekpanne en verdeel die mengsel tussen die twee panne.  Stamp die panne op die tafel sodat al die lugblasies in jou deeg kan breek.
  6. Bak vir 30 – 35 minute by 180C

Laat die koek goed afkoel voordat jy dit versier.

Botterversiersel

  • 500g versiersuiker gesif
  • 250 g sagte  botter
  • 60 ml kakaopoeier
  • 5 ml vanielje
  • 60 ml melk
  1. In jou mengbak room die botter en vanielje to lig.
  2. Voeg die gesifte versiersuiker en kakao by en klits
  3. Voeg nou die melk by en klits.